Ég hóf starfsemi sem höfuðbeina- og spjaldhryggsjafnari á Akureyri í byrjun júlí 2003.  Í ársbyrjun 2010 hóf ég starfsemi á höfuðborgarsvæðinu og mun vinna þar ásamt því að halda áfram starfsemi á Akureyri.

Ég hóf ég nám í hjúkrunarfræði við Háskólann á Akureyri haustið 2003 til þess að öðlast betri innsýn í meðhöndlun líkamans og samskipti við skjólstæðinga mína og útskrifaðist sem hjúkrunarfræðingur vorið 2007.

Vorið 2005 hóf ég að kynna mér TFT-meðferð (Thought Field Therapy) og sótti námskeið í þeirri aðferð í Chicago í september 2005 eftir að hafa farið í gegnum yfirgripsmikið sjálfsnám með aðstoð bóka, diska og myndbanda sumarið 2005.

Ég er eini Íslendingurinn sem sótt hefur nám í TFT og fengið skírteini og leyfi frá Callahan Techniques til að kenna meðferðina. Í september árið 2007 fékk ég leyfi til að kenna meðferðarrunu (algorithm) námskeið TFT eftir að hafa lokið tilskyldu námi.

Ég hef lokið námi í Cranio-skólanum, sem er skilyrði fyrir inngöngu í Cranio – félag höfuðbeina- og spjaldhryggsjafnara á Íslandi. Námið er yfirgripsmikið og þeir nemendur sem ljúka námi eru færir um að veita árangursríka meðferð við margs konar kvillum. Námið er í sex hlutum og tekur samtals tvö ár þar sem skiptast á krefjandi námskeið og reglulegar æfingar og heimaverkefni. Nánari upplýsingar um námið er að finna hér á vefnum. Jafnframt námi í höfuðbeina- og spjaldhryggsjöfnun tók ég að mér að þýða námsefnið sem  Thomas Attlee, stofnandi og skólastjóri College of Cranio-Sacral Therapy (CCST) í London, hefur samið og notar við kennsluna. Ég sótti fyrsta námskeiðið af sex í höfuðbeina- og spjaldhryggsjöfnun í maí 2001 og það sjötta og síðasta í júní 2003.

Nám í Bowen tækni skiptist í fimm hluta og hef ég lokið því námi með verklegu og skriflegu prófi undir handleiðslu Margeirs Sigurðarsonar og Julians Baker, skólastjóra European College of Bowen Studies (ECBS) í London, en nánari upplýsingar um námið er að finna á öðrum stað hér á þessum vef og á öðrum vefjum sem vísað er til. Í apríl 2005 tók ég námskeið þar sem ítarlega er fjallað um notkun Bowen tækninnar gegn íþróttameiðslum af ýmsu tagi. Kennari á því námskeiði var Paula Esson frá Englandi.  Einnig hef ég lokið námskeiði þar sem sérstök áhersla er á axlir og mjaðmagrind.

Ég er fædd 1963, bý og starfa á Akureyri, er í sambúð og á fjögur börn. Ég hef mikinn áhuga á andlegum og dulrænum málefnum, sérstaklega í tengslum við það að bæta líf og heilsu, bæði hjá sjálfri mér og öðrum

.